Column Oprechte Dalfser Courant

Dikke riest met zuutnat 30-10-2013

Allemachtig völle volk kik noar programma’s as Heel Holland Bakt en zo. Meer as ’n miljoen. Det is mooi of niet dan.

D’r giet weinig – mar wel wat – boam ’n börd vol läkker etten. Of bie de koffie ’n värs taartie van de bäkker.

Giet d’r aollemoal met smaak in.

Al det bakken en broaden is wel mooi en belangriek – zonder etten en drinken gien lèèm - mar ie wördt d’r ok gauw te dikke van. Veural luu die zittend wärk hebt doar last van. Luu die in de bouw zit kunt al die calo’s d’r wel weer uutwärken.

Veur de lijn is kokken dan ok better.

’t Wachen is dus op programma’s as Käts Dalfsen Kokt of Hoegedoanig Kokt Dalfsen op Vechtdal TV.

Det zol mooi uutkomm, want dan kan d’r meer andacht egeven wönn an de echte, gezonde en olderwetse Sallandse pot.

Zelf bin ik gek op kruudmoes. Allenig: de rest van ’t gezin kan d’r wel van spiejen, zo smèrig vind zie ‘t.

Dus kump ’t zowat nooit op toafel. Det is jammer, want zeg noe zelf: kärnemelk met gort, dikke rozienen,

kruudmoesgruunte – kärvel dus -, ’n flink ende worst en ’n stuk gerookt spek, doar lus ie toch wel pap van?

De spekzwoare van vrogger – met nog de leste hoarspiers van ’t värken d’r an vaste – mis ik niet.

Kenners begriept det wel.

Ok al kwam det värkenvel uut de slächterieje van de Piepen Toone – biegenaamd de Hutspotpiepe - , die ok de stärten

veur de snärt lèveren. Zundaangs bleef d’r vrogger bie mien moe wel zovölle oaver det wie moandags koale kruudmoes

konn etten. Zo uut de kelder op ’t börd. Merakel. Wie op kruudmoes gien sloek kan kriegen, kan zich op

Ommer krentjesbrij, zuute plässies of op riest met proemedanten störten. Met riest is det toch iets ampärts.

Wie hebt hier in de streke toch genog oogst van ’t bouwlaand: spelt, pällegärste, tärwe, haver, rogge en toch hef de riest

zich noar binnen ewärkt. Wie van boam de vieftig kent noe niet ’t hemelse gerecht Dikke riest met zuutnat?

Ie weet toch wel wat zuutnat is? En dan met spek en wost as ie det kon tugen. Heel wat mèènsen uut Salland bint d’r

groot met ewönn. En niet dikke.

Det kun ie wel wönn op ’t Sallandse Bakfeest. Van de drank dan.

Mar det is weer ’n heel ander verhaal.

Werkgroep ’Dalser’ dialect. Jan Sibelt