Column Oprechte Dalfser Courant

 

 

Wi-j hebt vekaansie   24-7-2013

 

De läste specie wödt op emäkt en de troffel giet in ’t vet. ’t Is vekaansie en op de steigers is ’t stille.

Gien radio met geheime zender meziek. Gien geraetel van de betonmölle. Ok de broodtrommel hef driej wekke rust.

De meeste bouwvakkers zit op de camping met een grootn pot bier op taofel. De biene gestrekt en ‘n wost binn bereik.

Hier muj now een joor häd veur wärkn en gaot t’r van uut dej dit vediend hebt.

Moe zit onder de luifel in de Libelle te blaenn. Bärre ni-jsgierig hoe de artiestn zich vermaekt in een wärm laand.

De kinder bint met mekander an ’t duveljaengn in ’t zwembad en de tied…oh die giet zelf zien gank.

’s Mäns vrog opstaon is t’r nie bi-j. Wat een leamm.

Heemao nie deankn oj nao de vekaansie wel weer an ’t wärk könt.

Hoe stiet oe bedrief d’r veur? Nee, det wil iej ageens nie weetn.

En toch benowd oe dit wes want iej kent t’r een bonke die al ’n gaanse tied in de WW zit.

Ach, doet t’r nog mas iene in Derkie. Zie smaekt goed en wi-j ziet wel hoe ’t löp.

De zunne schient oons mooi op ‘m kop dus geniet van de dag. Gaoj vanaomd ok nao de bingo?

Nee Gait…ik dache dew saemm een einde gungn kuijern. De gaanse dag lig iej met de konte in ‘n stoel en ik gunne oe best

een flessie bier en ’n borrel ma wil wel in beweaging bliemm. Veur oe is ’t ok goed dus… wat let oe?

Veurmekaere Derkie, ik gao mee ma dan pakke wi-j onderweg wel een terassie.

De kinder vemaekt zich wel want meeloopm doet ze toch nie.

Asse mooi achter ’n pilsie en een glas wien zit giet Derkie zien mobieltie of.

Gait kek verwonderd van wie mut det now weane?

Wach ma, ik geeve oe Gait wel.

’t Was de uutvoerder en die vertelln det ze de anbesteading van zestig wonign ekreangn hann.

Dus…..nao de vekaansie weer häd an ’t wärk.

 

Werkgroep ’Dalserdialect.   Wim van Leussen