Völ heil en zeengn.   8-1-2014

 

Olderjoorsaomd was vrogger een echte ofsluuting van ut verloopm joor.

Um zeumm uur aj kärke en hier wönn stille staone bi-j wat t’r ammao passeerd is det joor.

Ok nuumm ze de naemm van iederiene die uut de tied räekn.

Nao de dienst gung iej nuus want door stund de taofel kloor met van olles en nog wat t’r op.

Ut was net ovvie ’t hele joor niks ehad hann.

Vleis was de hoofdzaeke, det kank mie nog goed veur de geest haeln.

Teangn ruum tien uur aj de boek goed dikke gettn en woj wel op ’t nöst an.

’t Oale joor uutzittn deenn wi-j nie, de vaolnde dag dan most gebeurn.

Ni-jjoorsdag gung iej de buurte deur, bi-j femilie langs en met de kammeraodn op pad.

Iej weansn mekaere gelukkig ni-jjoor, völ heil en zeengn, geluk in tuk of mangs zalig

ni-jjoor. Aj in disse tied um oe hen kiekt wödt de joorwisseling wel oorig aans evierd en…

ik mut eerlijk zengn dit is ja zo mooi. Milln november köj in de kraantn a leazn woor de

feestn bint en tut hoelange ze deur gaot. Een kärkdienst is t’r nog wel ma wödt steeds

minder bezöcht. De aoverleednden wödt in november al of eleazn en ’taofeln’ is heemao

uut de moede. De flesse kump op taofel. Een böd met wost, keeze en sjips stiet t’r naost

want ut joor mut toch goed of eslötn wönn. Kruudfiesters en vuurpeiln likt a kloor veur

’t griepm. Wi-j loert ammao nao de tillevisie, de klokke tikt de läste menuutn vot en dan

begint ut grote vuurwärk. De wolkn hebt olle kleurn van de reangnbaoge en pättie luu

schiet veur honderden euroos de lucht in.

Door wacht weer 365 daengn op een invulling en hier köw zelf een bult an doen.

Kiek is um oe hen, maek is een babbeltie met alleentstaonden, teun is belangstelling bi-j

luu met bärre ongemak en verbeelt oe zelf nie dej better bint as oe medemeansn.

Dit gef een goed gevuul, kost oe niks en..de tied vlög umme.

Lieve meansn, ik weanse oe ammao völ heil en zeengn.

 

Werkgroep ’Dalser’ dialect.    Wim van Leussen