Column Oprechte Dalfser Courant

 

 

Oonze gedachtn..    1-5-2013

 

Aj vandaege an de dag de kraante least of ’s aoms nao de tillevisie kiekt

dan is wat Den Haeg oons hef belaofd nie wat door nog ’n bettie op liekt.

Febriekn sluut, meansn staot op straote, ‘t laand van melk en hunnig lek wiet vot

veur ’n bonke hädwärknde Nederlaanders is dit een onbegriepelijk zwoor lot.

 

Oonze Koneginne giet ’t rustiger andoen, 30 april is Prins Willem zien grote dag

hi-j giet in Amsterdam de eed oflengn en van of dan Koning Willem weazn mag.

Ik wete zeker dew nie hoeft te twiefeln, hij dut wat van hum wödt verwacht

zien umgank met ‘t Nederlaandse volk, door is heel goed aover nao edacht.

 

In mei leg ieder veugeltie een ei behalve de koekoek en de griet

det bint een pae hele vremde vogels die legt in de meimaond niet.

De koekoek is een machtig lui värkn, vlög aoveral rond en kek goed uut

leg zien ei in een vremd nössie zodet ’t deur “gastveugeltieswödt uut ebruud.

 

Dit dut mie deankn an de zestiger joorn toen kwaamp ut wärkvolk aoveral vot

’t smerige wärk was veur een aander wi-j hann toch hunnig genog in de pot.

Is de “koekoek” now een beschärmde vogel of giete gewoon zien eingn gank

vogels die getrouw in mei een ei legt kriegt deur die “koekoek” stank veur dank.

 

In mei denke wi-j an de bevrijding en wat de “buurnoons hebt an edaon

ok al is ’t achtnzestig joor eleedn toch muw hier wel eam bi-j stille staon.

Wi-j zegt: dit mag nie weer gebeurn, de vrijheid is toch bässnd völle weerd

ma aj zo rond kiekt op oonze wereld dan hew hier nog steeds nie van eleerd.

 

Oons leamm hew nie veur niks ekreangn, ok al giet ’t mangs baomm oons vestaand

vedriet, naerigheid, ellende en bli-jdschop giet heel vaeke haand in haand.

Laow d’r saemm ut beste van maekn zo det ’t oons vädder goed mag gaon

dan is ‘t veur iederiene een bevrijding, aj positief in ut leamm könt staon.

 

Werkgroep ’Dalserdialect.    Wim van Leussen