Column Oprechte Dalfser Courant

 

O, die härfst     13-11-2013

 

Wat bint d'r toch völle mensen gek op de härfst.

 

As 't op 'n zundag in de härfst mooi weer is dan bärst 't van de mèènsen in de bossen. Leerzen of

stevige schoene an en dan met grote passen deur 't gevallen blad banjeren.

Det gif zo'n mooi ruisend geluud. Kleine wichter en honde vindt det ok zo mooi. De zönne kump dan

zo geniepig deur de deels al kale boomtakken hen gluren. Die zunne is ok neudig um die

alderbässend mooie kleuren goed te zien. Det is veur alleman kieken en genieten.

Donkerrode amerikaanse ieken. Det gif ok zo’n mooie tegenstelling met die gel gekleurde bärken.

Net zo mooi as bie oons ‘t rooie van de wingerd en ’t gelle van de viegenboom teeng de butenmure.

As ie deur Vilsteren en deur de Rechterse dennen ried, fietst of loopt dan ziet ie goed ’t verschil met

noaldbomen. De loofbomen goat d'r met strieken. Ok as 't slech weer is dan ku'j genieten.

De wind kan dan zo läkker deur de boomm boezen en bulderen. De takken kraakt an de stam.

Blad wèèjt op en ie doet de krage van de jasse goed op en schud oe de scholders.

Oh wat kan ik toch genieten van die härfst.

 

Wat hebt d'r toch 'n hoop luu 'n hekel an de härfst.

 

De warmte van de zommer is vot, soms mut de kachel of de verwärming al weer an. 't Is al weer vrog

donker soams en eind oktober is die verrekte wintertied al in egoane. En aaltied weer die wind.

Dan die rèèngbuujen. Dikke mist. Ie kunt buten niks meer beginnen. Ja, bladhärken in ‘n hof.

Zakken vol van det rottende spul ku’j noar die bladbakken van gaas brengen. Die in ’t weekend dan

weer deur opgeschötten vèènt ummegooid wörd. Woar al det blad toch vandan kump?

Zundags weer slecht weer, ku'j de hele dag binnen zitten te koekeloeren. ‘n Nare tied.

Volle gries in de lucht. En dan al det vocht. De roeten besloat oe de halve dag.

Ie wördt d'r niet goed van. Ja, mangs as die zunne d'r ins deur kump dan is det wel mooi, doar wul ik

niks van zeggen, mar lange duurt 't nooit.

Dan nog liever de winter. Dan weet ie woar ie an toe bint.

Nee, härfst, gättebah, ik vinne d’r niks an.

Werkgroep ꞌDalserdialect.    Jan Sibelt