Column Oprechte Dalfser Courant

 

 

Een heel aander leamm  1    29-5-2013

 

Nee, door hatte nie op ereaknd dette op zien aoln dag nog in ’t verzörgingshuus zol komm.

Altied kärngezond en nog steeds häd wärknd op zien boerderi-jgie.

Aj um zo zaangn zoj nie zengn dette de tachtig allange veurbi-j was. Hi-j zag t’r zo kregel uut.

Feinlijk hatte hopt dette de läste leamsjoorn op zien boerderi-jgie kon deurbrengn. Temiddn van zien bieste.

Dinge könt mangs zo aans loopm. Op ‘n fataaln männ wasse in de schure uut egleene en had doorbi-j ’t linker hup ebrökkn.

De gaanse dag heffe op de grond lingn wachn op hulpe. Een buurman vund hum.

Olles was toen in ’n stroomvesnelling ekomm. Eerst de dokter, toe de zieknwaengn en doornao een lange weg van genezing.

Ma ja, in ’t zieknhuus konne doornao nie bliemm en umdette allinnig woonn konne ok nie trugge nao zien spulligie.

Zie brachn um nao ’t verzörgingshuus en door wasse nie zo wies mee.

Hi-j hoppm hier zodaonig op te knappm dette weer trugge kon nao zien bieste en zien laand.

Hi-j mos t’r nie andeankn det dit verzörgingshuus ut läste statsjon van zien leamstrein wönn.

Och, hi-j wönn hier goed verzörgd. Hi-j kreeg hier op tied zien ettn en drinkn.

Fijnlijk had ‘t hier better dan in huus. Door ligt nie an.

De zusters doet ok flink heur beste um ‘t hum zo goed meuglijk nao de zin te maekn.

Offe wil of nie, zien gedachn gaot steeds nao zien boerderi-je. Door lig zien leamm.

De goeie vezörging kan door nie teangn op. Ut leamm is hier ärg ientoonig. Hi-j slet zien daengn met zittn en nog is zittn.

Zo of en toe een bettie therapie en dan ma weer zittn en nao buutn kiekn. Völle is door nie te zien ma een meanse mut wat.

Ok now kekke ongeïntresseerd van hum of. Achter de graniums zittn valt nie met.

Hi-j kek nao de velepte bloemm die in de veansterbanke staot. Det is nog een ärfenisse van de veurige bewoner.

Tut aover 14 daengn.

 

Werkgroep ’Dalserdialect.   Wim van Leussen.