Column Oprechte Dalfser Courant

 

 

De rookwost    21-8-2013

 

Hej ’t al eheurd? Gait Jan is met zien Leida een dag hen fietsn ewest.

Jao, een dag wil nog net ma een wekke vot vindt ‘t meanse niks.

Leida is een eisgereide poestert en wil pesee snaches in zien eingn bedde slaopm.  Gait Jan wil wel driej wekke op pad en ’t liefste nao Spanje of zo. Door loopt ze vanbaom heemao naeknt en onderan zit t’r zon klein läppie veur.

Dit vindt Gait Jan machtig mooi.

Det is wat aans as die gebreide böstrok en flanelln onderbroekn van Leida.

Now ja….as ’t machtig wärm is giet ’t baomste kneupie van de böstrok wel lös ma blote bienn…, niks t’r van.

’s Mäns bint ze vrog op pad egaone. De fietstassn vol met koffie, stoete, sinasappels en een röllegie schärpemunt.

Leida wus nie det Gait Jan stillegies een rookwost in de binnzak van zien jässe stopt had.
Onderweg mosse vaekepissn” en dan beette met iene van den wost of. Ien keer heffe zich vegalloppeerd.

Gait Jan had nie emärkt det t’r een leutie an den wost zat. Wat hebbie door in de mond Gait Jan? vreug Leida.

Oh e…niks gien bezunders. Door vleug mie net een vliege in de mond en die biet ik now an stukkies. Lillijke gastert aj bint.

Uutspi-jn die prut. Wie weet woor die vliege nie op ezettn hef. Uutspi-jn zeg ik oe toch of hej ’t met de oorn? Ut leutie vleug

de bärm in.

Toe smiestert, det is gien vliege man. Iej hebt toch die rookwost van ’t kelderplänkie nie epakt hè?

Männ wik kruudmoes kokkn en door is den wost veur. Gait Jan kreeg ’t spaansbenauwd.

Leida, aj now een klein bettie kruudmoes kokt dan is t’r nog wost genog heur zei een käts veraldereerde Gait Jan.

Nee klojo, niks gie klein bettie.

Ik gao wel nao de C1000 en haele een ni-je wost. Ik wete dej niks te snugger bint ma veur ’n ezel hak oe nog nie veslettn.

Gait Jan gunk nog mas ’n keer pissn en dach..as iej gien klein bettie kruudmoes wilt kokkn dan vret ik ’t läste stukkie wost op.

 

Werkgroep ’Dalserdialect.   Wim van Leussen