Column Oprechte Dalfser Courant

 

 

De beste weansn..   3    6-2-2013

 

Now had Derk 21 boern in zien rit ma 21 borrels, in iene wekke, was ok veur hum te volle.

De eerste dag kreege de bosschop goed mee van Beerndiene.

As iej ut lef hebt um.. ma Derk kwaamp ‘t meanse al halfweg.

Ach vrouwe, as ik de weg nie meer weete is door nog antoe ma oonze  Broene brengt mie wel bi-j huus.

Maekt oe ma gien zörgn. Onderweg hatte met Johannes of esprökkn dette bi-j vief boern an zol lengn.

Dan haj veur d’aandre daengn meer ruumte.

Ruum in de naomiddag kwaamp Derk ’n dam op vaenn en Beerndiene stund al te wachn.

Lao mie is roeken…stinkie ok nao drank? Neu det valt mee vandaege, mos ’t meanse toegeemm.

Ma hi-j wus nie det Derk een dubbele proeme tebak in de mond had. De vaolnde daengn kwaamp Derk zo deur de keuring. Zaoterdaengs was buurman Dieks zien läste borrelboer en det leup een bettie aans as bedoeld was.

Vaeke namme een zak mael mee van Feijn en brache een akkuu nao Geert Huttn.

Dit was toch wel een borrel weerd vund Dieks en Derk had de smaek goed te pakkn. Ma oh goetegoed!!!

Toen Derk in de bienn wol deud de jannever zien wärk.

Gaot ma eam weer zittn zei Jonnao van Dieks, dan zet ik ’n bäkkie stärke koffie en iej zölt zien dej door van opmonterd.

Een stief kwattier laeter wönn Derk op de waengn ehölpm en de Broene kreeg suukeklunties veur ’t wachn.

As Beerndiene uut zien vel knapt dan zeg ma det ut oe, bij oons, in de rugge schöttn is heur.

Bi-j naovraoge vetelle wi-j dit ok.

Aj vestaendig bint bärgie oe tammee een steugie op in de beddestea en dan kreijt t’r gien haene nao zei Jonnao.

Derk hoemm agiens gien fut te zengn.

De Broene sjokkn op huus an en Derk toovern zien Kentuck-proemtebak weer veur ’n dag.

Hij proppm de mond goed vol met dit wonderspul. Beerndiene zag um van de waengn ofgliern en vreug .

Wat heb iej dan? Kriek now geliek det melkvaeders grote zoepes bint?

Iej maegt oe wel schaemm Beerndiene dej zo te keer gaot teang oe häd wärknde man.

Ut is mie bi-j Dieks in de rugge schöttn en ‘k gao drekt bedde in. Oh, hek ut dan heemao mis?

Jao, ik roeke ok allinnig ma tebak. Muj nog ’n asprientie hämm veur de piene?

Neu, doet ma nie, ik deanke det ruste mie goed dut.

Zunnessmiddaengs leup Derk ’n eandtie rond en kwaamp Jonnao met Dieks teangn in ’n bos. Zie scheutn in de lach.

Hej ok venömm dek driej bussen eruild hebbe want oe bussn stunn bi-j oons.

Zo köj ma weer zien zei Derk.

Aj een goed peerd en goeie buurn hebt dan köj wel melkvaeder weane zonder det ze deankt dej een zoeped bint.

 

Werkgroep ’Dalser’ dialect.     Wim van Leussen.